Info

Skrifstofa

Íbúðir

Almennar upplýsingar

Félagsstofnun stúdenta annast rekstur Stúdentagarða. Hlutverk þeirra er að bjóða námsmönnum við Háskóla Íslands til leigu hentugt og vel staðsett húsnæði á sanngjörnu verði. Húsnæðið er af ýmsum stærðum og gerðum. Fyrir einstaklinga er boðið uppá einstaklingsherbergi, tvíbýlisherbergi og íbúðir (studio), tveggja herbergja íbúðir fyrir pör (paríbúðir) og tveggja, þriggja og fjögurra herbergja íbúðir fyrir fjölskyldur. Á háskólasvæðinu sjálfu eru; Hjónagarðar, Vetrargarðar og Ásgarðahverfið við Eggertsgötu 2-34, Gamli Garður við Hringbraut og Skerjargarður við Suðurgötu 121. Skuggagarðar eru við Lindargötu 42, 44, 46 og 46A. Allt húsnæði Stúdentagarða hefur aðgang að tölvuneti HÍ.

Umsóknir

Umsóknum um garðvist þarf að skila með rafrænum hætti á umsóknarformi sem er að finna undir flipanum "Umsókn" í aðalvalmynd heimasíðunnar hér til vinstri. Nýnemar við Háskóla Íslands geta ekki sótt um húsnæði hjá Stúdentagörðum fyrr en 1. júní, eða um 3 mánuðum fyrir upphaf náms. Skráðir nemendur við HÍ geta sótt um garðvist hvenær sem er ársins. Með því að senda inn umsókn sína gefur umsækjandi Stúdentagörðum heimild til að sannreyna uppgefnar upplýsingar og senda inn fyrirspurn um húsnæðiseign sína til Fasteignamats ríkisins, fjölskyldustærð eða barnafjölda til Hagstofu Íslands og námsframvindu og/eða greiðslu skráningargjalda til Háskóla Íslands.

Úhlutanir

Húsnæði á Stúdentagörðum er almennt úthlutað til eins árs í senn frá 1. september til 31. ágúst. Á Gamla Garði og hluta Skerjagarðs þar er tímabilið frá 28. ágúst til 26. maí (9 mánaða samningar). Í Skuggagörðum er samningstímabilið frá miðjum ágúst hvers árs og fram í miðjan ágúst komandi árs. Stuðst er við úthlutunarreglur Stúdentagarða við úthlutun húsnæðis (sjá Reglur undir flipanum Umsókn). Skrifstofa Stúdentagarða sendir umsækjendum tilkynningu um úthlutun eða biðlistanúmer með rafrænum hætti á það tölvupóstfang sem skráð er á umsóknina. Úthlutun og veru á biðlista skal staðfesta á heimasíðu Stúdentagarða fyrir tiltekinn tíma. Úthlutað er allt árið í það húsnæði sem losnar á öðrum tímum ársins, samningar þá gerðir til loka yfirstandandi leigutímabils.

Samningar / Gjaldskrá

Úthlutunarhafi skrifar undir leigusamning áður en húsnæðið er afhent. Samningarnir eru almennt gerðir til eins leigutímabils í senn og endurnýjast að þeim tíma liðnum að uppfylltum skilyrðum úthlutunarreglna (sjá reglur undir Umsóknir). Í júlímánuði ár hvert er gerður nýr samningur milli Stúdentagarða og leigutaka. Undirriti leigutaki ekki nýjan samning innan uppgefins tímafrests verður samningurinn ekki endurnýjaður og íbúð úthlutað til nýrra leigutaka.

Aukaafrit af leigusamingi kostar 500 kr.
Umsýslugjald fyrir hvern stofnaðan samning er 4000 kr.
Milliflutningsgjald er 10.000 kr.
Tryggingafé sem erlendir ríkisborgarar greiða er 50.000 kr

Húsgögn

Húsgögn fylgja herbergjum á Gamla Garði, tvíbýlum í tegund 5-5 í Ásgörðum, Eggertsgötu 18 og 22, auk þess hluta Skerjargarðs sem leigutímabilið er frá 28. ágúst til 26. maí (9 mánaða samningar, íbúðartegund 1-7).

Flutt í nýtt húsnæði

Áður en flutt er inn hafa leigjendur samband við umsjónarmann fasteigna eða garðprófast á Gamla Garði og fá uppgefið hvenær húsnæðið er tilbúið til afhendingar. Við móttöku húsnæðis framvísar leigutaki undirrituðum leigusamning. Umsjónarmaður fasteigna gerir úttekt á húsnæðinu við hver leigjendaskipti og skrifar nýr leigjandi undir úttekt umsjónarmanns þar sem hann samþykkir ástand húsnæðisins. Leigjandi fær síðan 7 daga frest til að gera athugasemdir við úttektina. Athugasemdunum ef einhverjar eru skal skila á sérstöku eyðublaði sem leigjandi fær við móttöku húsnæðisins. Að þeim tíma liðnum er litið svo á að úttekt umsjónarmanns sé samþykkt.

Uppsögn/skil á húsnæði

Húsnæði er sjálfkrafa sagt upp við lok leigusamnings. Þeir sem hyggjast búa áfram á görðum þurfa að skrifa undir nýjan samning og skila til skrifstofu Stúdentagarða fyrir miðjan júlí ár hvert. Ef húsnæði er sagt upp áður en leigutíma líkur skal nota þar til gert uppsagnarform á heimasvæði leigjandans. Stúdentagarðar áskilja sér rétt á þriggja mánuða uppsagnafresti á leigutímabilinu. Uppsagnarfrestur styttist ef skrifstofa Stúdentagarða getur útvegað nýjan íbúa fyrr, en fresturinn verður þó aldrei styttri en einn mánuður frá uppsögn. Umsjónarmaður fasteigna framkvæmir úttekt þegar íbúð hefur verið tæmd og þrifin. Íbúi undirritar úttektarblað og umsjónarmaður afhendir frumrit til skrifstofu Stúdentagarða til lokauppgjörs. Ekki er gengið frá uppgjöri fyrr en úttektareyðublað og greiðslukvittun fyrir síðustu mánaðarleigu liggja fyrir.

Húsaleiguábyrgð

Íslenskir leigutakar þurfa ekki að reiða fram fyrirframgreiðslu eða húsaleiguábyrgð af neinu tagi, heldur greiða umsýslugjald sem innheimtist samtímis fyrstu húsaleigu. Gjald þetta sem er 4,000.- greiðist einu sinni á ári og er ekki endurgreitt. Erlendir leigutakar þurfa auk þess að leggja fram 50.000 króna tryggingargreiðslu sem er endurgreidd við brottför ef engar skemmdir hafa orðið og allir reikningar hafa verið greiddir.

Húsaleigubætur

Hægt er að sækja um húsaleigubætur vegna leigu á öllu húsnæði Stúdentagarða, leigusamningar þurfa að gilda í lágmark 6.mánuði. Leigjendur sækja sjálfir um húsaleigubæturnar hjá viðkomandi félagsþjónustu eða sveitarfélagi.

FS - Stúdentagarðar • Háskólatorgi • Sæmundargötu 4 • 101 Reykjavík • Sími 570 0800 • fax 570 0709